勁讚哥哥有情有義 黃百鳴：呢個人真冇話可說！

LCAS

出处：苹果娱乐 2018年01月29日


講到最欣賞嘅人黃百鳴就好爽快答咗係張國榮（哥哥）。


佢仲大讚哥哥係一個有情有義嘅人。



黃百鳴喺影壇超過30年，曾經與無數演員同導演合作過，佢接受本報連載式專訪時，梗係要問下佢有邊啲演員係佢好欣賞同失望啦！佢話：「失望嗰啲我唔講喇！亦都太多，無謂講喇！」不過最欣賞嘅人佢就好爽快答咗係張國榮（哥哥），不過可惜對方已經唔喺度！

早於新藝城年代黃百鳴已經看好張國榮，所以主動搵哥哥簽咗3年電影合約，佢話：「我最欣賞、最尊重，我成日都講一個人，嗰個係張國榮，其實佢當時喺新藝城，拍第一套片嘅時候呢，即我哋唔識佢o架，嗰套叫《聖誕快樂》，嗰套戲嘅主角叫陳百強，佢喺套戲只係做配角嘅啫！但點解拍完套戲我哋會簽佢呢？就係覺得......咦，佢真係有潛質喎！佢真係會好好，我哋睇人真係有啲眼光，所以即刻捉住張國榮同佢簽約咁一簽就3年，我就同佢嘅經理人陳淑芬，一杯咖啡就搞掂，好簡單，3年到囉喎，又飲杯咖啡，又簽3年，甚至乎後來唱片都簽埋畀我哋啦！」

黃百鳴點解咁喜歡哥哥，係因佢覺得演員之中，哥哥算係一個有情有義嘅人，第一套《家有囍事》成功之後，相隔幾年再拍《97家有囍事》嘅時候，因為周星馳開了天價片酬，黃百鳴唯有喺其他方面慳啲晒，所以第2集唔打算請哥哥演，搵咗當時片酬平啲嘅吳鎮宇頂替。

點知到開鏡嗰日，哥哥打電話畀佢，唔通哥哥要打電話鬧鬼佢？黃百鳴話：「哥哥打嚟搞到我唔多好意思，佢話：『百鳴，你拍《家有囍事》呀？』我話係呀係呀！佢就講：『我嚟客串，我要拍個ending，我嚟吖！』佢二話不說走嚟客串，係無收過我一毫子，量度幾大，好多人會好唔開心，問點解唔搵我，但哥哥第一句話你拍《家有囍事》點解你唔搵我，佢冇講，佢只係話你拍《家有囍事》恭喜你！嚟幫你客串！嘩，我當時真係好內疚！我點解唔搵佢呢！嗰陣時已經拍緊，剪綵嗰幕，呢個人真冇話可說！(做出手勢good)」

黃百鳴又讚哥哥對長輩係好尊重，每年嘅大年初一，佢必收到哥哥打來拜年嘅電話：「每一年嘅大年初一，我必收到佢打嚟電話同我講恭喜發財！亦都可以咁講，由新藝城到後嚟我嘅東方電影，佢淨係簽畀我o架！因為我哋個合約就好鬆動嘅！除咗拍我哋戲呢！容許佢拍外面嘅戲嘅，只要打招呼就得o架喇！所以佢一簽畀我東方嘅時候呢，我都未拍《家有囍事》，佢同我講，有套戲搵佢叫《霸王別姬》，佢好想拍，我話你去拍，即係話我支持你去拍，你拍完先嚟拍我，所以我哋係好有默契架！咁所以佢，哥哥簽嘅合約，由新藝城到東方，只係我哋兩間架！都係同我有關o架！」

直至到97之後，因為個市道不境，盜版各方面充斥，黃百鳴就話當時冇再同哥哥簽約，而哥哥亦回復自由身拍戲，而後期黃百鳴就少同哥哥聯絡，去到哥哥出事嘅前幾年少聯絡咗。

採訪：陳月媚、懷鈺
攝錄：馮峰、卓振輝
攝影：陳俊強

——————————————

拍《家有囍事》係「被迫」? 星爺原本角色係……

出处：苹果娱乐 2018年01月30日


《家有囍事》一眾演員。

大家有冇發現，自92年賀歲檔上映過周星馳、張國榮同張曼玉主演嘅《家有囍事》後，之後每逢過年，一打開電視機，總會有電視台重播呢套戲，而觀眾好似睇極都唔厭，只要見到電視播緊就一定唔會轉台！嗱！呢部喜劇經典都係黃百鳴一手炮製出嚟！佢日前接受本報連載式專訪，爆咗唔少開拍呢部戲時，好多鮮為人知嘅趣事出嚟！

佢話部戲找周星馳演係迫於無奈，1992年拍攝《家有囍事》找周星馳是「被迫」，佢話：「我最先呢個角色三兄弟，林子祥做大佬、張國榮同我、我就做個cam cam地，拍吳君如做個tom boy o架嘛，張國榮做周星馳嘅角色，就拍張曼玉，點知林子祥間屋...就喺，你記唔記得有一年(地震定火燭)火燭，返唔到嚟，喺美國返唔到嚟咁點呀！即刻換人囉！咁我第一時間就搵周潤發啦！點知周潤發就話我又做緊又係賀歲喎！嗰個叫做《我愛扭紋柴》，咁即係同你對打台喎！咁即係又係唔得啦！唔得，咁死喇，左搵右搵，咦！咁嗰陣時周星馳就啱啱冒升緊，咁就搵佢傾啦！」

當年找星仔拍呢部戲，星仔開咗一個天價，但黃百鳴一樣照俾佢：「我趕住要開拍吖嘛！咁所以呢，我明知佢收緊人哋200萬，佢要攞我800萬，我都畀佢，條友仔梗係(舌累)飯應啦。當然佢有個要求啦！睇完個劇本，佢話可唔可以畀我同張曼玉做對手呀！我話唔得，我同佢講：『錢你就攞足喇！嗰個對手係張國榮，已經定好咗o架喇，我話有兩個角色畀你揀，一係你就做個花心老公，一係就做個cam cam地，佢話打死我都唔做個cam cam地o架喇，寧願做個花心老公。」

1990年哥哥退出返咗去加拿大，我就話一定要搵哥哥復出拍《家有囍事》，我就畀咗個任務高志森，咁哥哥真係太後生退休嘛！咁我就叫咗高志森過去搵哥哥，寫好咗個劇本架喇！我就叫佢做個花花公子配呀張曼玉，叫高志森過去畀個劇本佢睇，想佢返嚟拍呢套戲，哥哥應承咗！」

點知佢一落飛機，就捉住我，話一定要同我飲餐茶，仲去我嘅乾坤閣，一坐低就話，嗱，我睇完個劇本，你唔好同我爭，我要做cam cam地，個對手係毛舜筠因為我哋兩個做係一定贏嘅，咁得啦，我唔會同你爭，我畀你啦！咁我惟有做個花心老公啦！跟住就撥個輪畀周星馳，同佢講：『喂，o靚仔你恨到喇！依家真係你同張曼玉做對手，咁我就同吳君如，點知又輪到吳君如抗議喇，喂，我做個tom boy, 我已經準備好晒，我會做得好好o架喎！你o依家要我做個賢妻良母，我點做呀！即做個白燕我點做呀！你咪做個搞笑嘅白燕囉！所以嗰執汗毛係我叫佢加上去o架！我話你整執汗毛喺度啦！」

採訪：陳月媚、懷鈺
攝錄：馮峰、卓振輝
攝影：陳俊強

月儿圆圆

哥哥，百分百好人

绝代佳人

身边的人都说他非常好，人品才能都是一流的，可见他有多优秀，唉。。。天妒英才