|
|
【哥哥‧15年】偶像中的偶像 謝安琪：佢嘅最高境界係佢嘅一份瀟灑
0401 00:00 苹果即时娱乐
哥哥張國榮除咗係唔少市民嘅偶像，仲係一班偶像中嘅偶像，唔少圈中人對哥哥都好尊敬，仲會視哥哥為學習對象。
河國榮：「哥哥好似走咗好耐，唔只15年，當日聽到佢走消息好愕然，最緊要係佢主動去做，係唔敢相信。佢離開唔只係心痛，係少咗一個人才，無論佢演戲同唱歌，佢都做盡自己功夫心機，所以佢啲嘢好靚。佢唱歌有佢特色，技巧非一般，所以好特別，好多人去扮，但好少人扮到，佢喺台上唱歌都似做戲。」
謝安琪:「我覺得喺舞臺上面每個歌手都好坦白，你自己係乜嘢人就好坦露咗自己，哥哥又一樣嘢係其他人好難模仿，佢嘅最高境界係佢嘅一份瀟灑，我覺得喺舞臺上面揮灑自如，心態好瀟灑，係好難而且係好有型，唔同階段嘅哥哥都有唔同階段嘅美態同吸引力，係令我最懷念。」
薛凱琪 ：「實在太多歌係鍾意同埋想唱，無奈地呢個唔係一個演唱會，所以...『為你鍾情...傾我至誠...請你珍藏這份情...』，第時有機會唱晒成首畀大家聽；我最掛住哥哥...其實真係講唔到一樣嘢，我掛住佢嘅電影、我掛住佢嘅歌曲，我掛住我可以再一次入戲院睇佢嘅騷，我掛住佢嘅訪問，我掛住佢嘅自然，每一方面哥哥嘅嘢，我都好掛住。」
張敬軒：「《為你鍾情》除左係哥哥嘅一首歌，仲係哥哥嘅餐廳。哥哥死左呢幾年，令我最掛住嘅係，哥哥喺台上嘅風采，佢嘅優雅同魅力，係好難模仿，係佢嘅自信同藝術細胞，由心而發嘅，喺我心目中張國榮只有一個。」
黎瑞恩說：「我唔唱歌嘅時候，哥哥復出番，我哋冇見過面，但我哋由細聽佢啲歌長大，佢做戲非常好，我睇佢演唱會非常開心，佢收放自如，係超級巨星，亦係我兒時偶像。」
劉德華說：「好快就15年，哥哥離開我哋一段時間，好多喜歡佢嘅人，都仍然覺得佢留喺我哋心裏面，希望趁呢個時候，同大家懷念一下哥哥，希望佢喺第二度都幸福快樂。」
劉美君:「係我對哥哥最深刻歌，細個唔開心時呢幾句歌詞好墮入我真實情景，永遠一聽就諗番發生件事。最惦念哥哥好nice，我細細個就識佢，臨決定移民離開娛樂圈前，喺酒店樓下見到哥哥飲緊嘢，佢攬住我叫我好好保重，好記得嗰種哥哥對妹妹關懷之情係點樣。」
張智霖：「好多嘢都好掛住，好多佢演過嘅電影好似《英雄本色》，時常都會百看不厭，《縱橫四海》甚至乎賀歲片都時想睇，佢嘅歌時常在自己心裏面，有一個永遠嘅playlist一樣。」他續說：「佢嘅歌由細陪到我大，認識咗哥哥、亦都係佢打牌嘅腳，喺佢度學到牌品好好，當時係好難忘嘅時光，我記得喺哥哥屋企打牌，又會喺佢屋企食飯 ，發覺佢對佢工人好好，我問佢究竟係一個點樣嘅觀念？佢話有時唔係要鬧死人，係要冧死人，我覺得好受用，係我喺哥哥身上學到對任何人都咁一致嘅態度。佢全部嘅歌我都熟悉，哥哥就好似喺我心裏面基本上冇離開過。」
關之琳：「同Leslie認識係我第一部電視劇開始，嗰時完全唔識演戲，佢幫咗我好多，後來大家做咗朋友，佢好錫我，好似妹妹咁，最掛住佢叫我把聲，佢唔係叫我Rosamund，係叫另一個名， 同佢拍戲嘅影像我都仲記得，佢唱歌特別有味道、有感情 ，4月1號佢過世嗰日，真係嚇到我暈低咗， 好快過咗15年嘞，我覺得佢仲喺度、仲喺周圍，只係去咗旅行。」
採訪：張俊銘、盧妹、黃曉妍、馬建華 |
|
IP卡
狗仔卡
发表于 2018-4-8 16:23:47
沉默卡
喧嚣卡
变色卡
显身卡
发表于 2018-4-9 15:07:45
